ZORAM TODAY| 7th October, 2026: Election Commission of India (ECI) chuan state tin Chief Electoral Officer (CEO), District Election Officer (DEO) leh Electoral Registration Officer (ERO) te chu October thla chhunga special drive nei turin a hriattir a. Special Intensive Revision (SIR) neih zawh taka Electoral Roll a hming chuang ve lo te zingah dan dik taka India khua leh tui , vote nei thei ngei tur paih emaw, hmaih palh emaw an awm chuan uluk taka enfiah tur  anih thu a tarlang.

Mizoramah chuan he Special Drive hi October ni 8, 2026 atanga neih tan tur a ni.  Special Drive chhung hian hetiang hian hmalak tur a ni ang : BLO ten SIR neih hmaa electoral roll-a awm si, SIR Final electoral roll-a awm ta lote chu a list an siam ang. Chung mite chu BLO ten an inah an tlawh chhuak leh dawn a ni. India khua leh tui dik tak te chu Form-6 hmanga electoral roll-a luh dil turin an hrilh hria ang. Anni bakah hian, vote nei thar tur, kum 18 tling tharte pawh an vai ang.

BLO list siam hi BLA te pawh pek ve tur a ni. BLO ten field verification an tih zawhah ERO te hnenah list hi an thehlut ang. BRO te chuan Representation of the People Act, 1950 leh Registration of Electors Rules, 1960 hnuaiah  hma an lo la ve leh ang a, tin, an thuthlukna siam chu Political Party te hrilh hriain a diklo awm nia hriatte chu a ngaihtuah nawn leh theih ang.

Booth Level Camp hi DEO ten a remchan dan angin an district ah an lo ruahman bawk ang. Special Drive chhung hian CEO, DEO, ERO ten a tam thei ang berin IG, FB, X leh Youtube kaltlangin mipui hriattur pawimawh te tarlan thin a ni ang.